A new series based on the Sherlock Holmes character James Moriarty is in the works.

සුප්‍රසිද්ධ රහස් පරීක්ෂක ෂර්ලොක් හෝම්ස්ගේ ප්‍රධානතම සතුරා වන ජේම්ස් මොරියාටි (Professor James Moriarty) මුල්කරගනිමින් සම්පූර්ණයෙන්ම නවතම කතාමාලාවක් නිර්මාණය කිරීමට මේ වන විට කටයුතු සූදානම් කරමින් පවතින බව Deadline වෙබ් අඩවිය විසින් නිල වශයෙන් වාර්තා කර තිබෙනවා. ලොව පුරා අතිශය ජනප්‍රිය වූ ෂර්ලොක් හෝම්ස් කතාවල එන මෙම ප්‍රබල දුෂ්ට චරිතය වෙනුවෙන්ම පමණක් මෙලෙස වෙනම කතාමාලාවක් නිර්මාණය වන පළමු අවස්ථාව මෙය වීම ද විශේෂත්වයක්.

Fremantle සහ Archery Pictures යන නිෂ්පාදන සමාගම් විසින් එක්ව නිර්මාණය කරන මෙම කතාමාලාව, සාමාන්‍ය ෂර්ලොක් කතාවකට වඩා සම්පූර්ණයෙන්ම වෙනස් නවීන අපරාධ විමර්ශන (Crime procedural) මුහුණුවරක් ගනු ලබනවා. මෙහිදී මොරියාටි යනු Durham විශ්වවිද්‍යාලයේ අපරාධ මනෝවිද්‍යාව පිළිබඳ මහාචාර්යවරයෙකු වන අතරම, ඔහු රහසිගතව එංගලන්තයේ පාතාල අපරාධ ජාලයක් ද මෙහෙයවනු ලබනවා. කෙසේ නමුත් වෙනත් ප්‍රතිවිරුද්ධ අපරාධ කල්ලියක් ඔහුගේ ජාලයට පහර දීමට පටන් ගැනීමත් සමඟ, තමාගේ සැබෑ අනන්‍යතාවය සඟවාගෙන පොලිසියේ උපදේශකවරයෙකු ලෙස සම්බන්ධ වී ඔවුන් සමඟ එක්ව වැඩ කිරීමට මොරියාටිට සිදුවීම වටා මෙහි කතාව ගෙතී තිබෙනවා.

Chris Cornwell සහ Oliver Lansley යන රචකයන් විසින් මෙහි තිර රචනය සිදුකරනු ලබනවා. කෙසේ වෙතත් මෙම කතාමාලාව සඳහා තවමත් නිල වශයෙන් නළු නිළියන් තෝරාගෙන නොමැති අතර, මෙතෙක් කාලයක් තිරයේ දුටු මොරියාටි නම් කෲර දුෂ්ටයා වෙනුවට ඔහුගේ වෙනස්ම ආකාරයක ප්‍රතිවීර (Antihero) ස්වභාවයක් ඉදිරියේදී මින් දැකගත හැකි වනු ඇති බවයි නිර්මාණකරුවන් වැඩිදුරටත් පවසා සිටින්නේ.