Lionel Messi retires from international football after 21 years

ජනප්‍රිය පාපන්දු ක්‍රීඩක Lionel Messi ජාත්‍යන්තර පාපන්දු පිටියෙන් සමුගන්නා බවට නිළ වශයෙන් නිවේදනය කරයි.

වසර 21 ක දීප්තිමත් ජාත්‍යන්තර ක්‍රීඩා දිවියකට සමුදෙමින්, සුපිරි පාපන්දු ක්‍රීඩක Lionel Messi ජාත්‍යන්තර පාපන්දු පිටියෙන් සමුගැනීමට තීරණය කර තිබෙනවා. 2022 වසරේ කටාර්හි පැවති පාපන්දු ලෝක කුසලානය ආර්ජන්ටිනාව වෙත දිනාදුන් 39 හැවිරිදි මෙම සුපිරි ක්‍රීඩකයා සිය Instagram ගිණුමේ සංවේදී සටහනක් තබමින් මෙම තීරණය නිල වශයෙන් තහවුරු කර තිබෙනවා. මෙම තීරණය ගැනීම තමන්ට දැඩි වේදනාවක් ගෙන දුන් නමුත් සමුගැනීමට සුදුසුම කාලය පැමිණ ඇති බව ඔහු සඳහන් කර සිටිනවා.

“මම ජාතික කණ්ඩායම නියෝජනය කිරීමට ආදරය කළා, සැමදා ආදරය කරනවා. මට ලබාදිය හැකි සියල්ල මම ලබා දුන්නා, දැන් මා සතුව ලබාදීමට තවත් කිසිවක් ඉතිරිව නැහැ. ඒ වගේම දක්ෂ තරුණ ක්‍රීඩකයින් රැසක් ඉදිරියට පැමිණෙමින් සිටින අතර ඔවුන්ට එම අවස්ථාව හිමිවිය යුතුයි” යනුවෙන් ඔහු සිය සටහනෙහි පවසා තිබෙනවා.

පසුගිය 2026 ලෝක කුසලාන අවසන් මහා තරගයේදී ස්පාඤ්ඤය හමුවේ අතිරේක කාලයේදී ලැබූ පරාජයෙන් දින 2 කට පසුව (ජූලි 21 වනදා) තමන් මෙම සමුගැනීමේ පණිවිඩය සකස් කළ බවත්, අගෝස්තු මස මුලදී සිදු වූ සිය පියාගේ අභාවයත් සමඟ මෙම තීරණය ගැනීමට වඩාත් අධිෂ්ඨානශීලී වූ බවත් ඔහු හෙළි කර තිබෙනවා.

ආර්ජන්ටිනා ජාතික කණ්ඩායම වෙනුවෙන් තරග 207 කදී ගෝල 125 ක් වාර්තා කරමින් එරට වැඩිම ගෝල ලාභියා මෙන්ම වැඩිම තරග සංඛ්‍යාවකට සහභාගී වූ ක්‍රීඩකයා ලෙසින් ඔහු ජාත්‍යන්තර පිටියෙන් සමුගන්නවා. ආර්ජන්ටිනාව වෙනුවෙන් 2022 ලෝක කුසලානයට අමතරව 2021 සහ 2024 Copa América ශූරතා මෙන්ම 2022 Finalissima ශූරතාව ද දිනාගැනීමට ඔහු නායකත්වය ලබාදුන්නා. ජාත්‍යන්තර පිටියට සමුදුන්න ද ඔහු Major League Soccer තරගාවලියේ Inter Miami කණ්ඩායම වෙනුවෙන් සාමාන්‍ය පරිදි ක්‍රීඩා කරනු ඇති.